Pananaliksik-Kompetensi ng mga Guro sa Senior High School sa Filipino

  • John Emil Estera Senior High School Department, Juban National High School, Philippines
  • Felisa D. Marbella Graduate School, Sorsogon State University, Philippines
Keywords: Research competence, Filipino Major Teachers, Teachers, Professional Development, Senior High School

Abstract

Nilalayon ng pag-aaral na ito na matukoy ang antas ng kasanayan ng mga gurong nagtuturo ng asignaturang Pananaliksik sa Filipino sa Senior High School na may espesyalisasyon sa Filipino. Gumamit ng deskriptibong-survey na disenyo at isinagawa sa 40 guro mula sa lalawigan at lungsod ng Sorsogon noong taong panuruan 2021–2022. Gumamit ng purposive sampling sa pagpili ng mga kalahok. Isang talatanungan na inangkop mula sa pag-aaral nina Gomez at Panaligan (2013) ang pangunahing ginamit na instrumento upang masukat ang kompetensi sa pananaliksik at kasapatan ng mga kagamitang pampananaliksik at iba pang materyales na ginagamit ng mga guro. Bukod dito, nagsagawa rin ng panayam upang matukoy ang tiyak na pangangailangan ng mga guro. Ang mga datos ay nakalap sa pamamagitan ng Google Forms at sinuri gamit ang mean, frequency count, at thematic analysis. Ipinakita ng mga natuklasan ang sumusunod na mean score sa kompetensi ng mga guro sa pananaliksik: Teknikal na Aspeto – 4.10 (May Kakayahan), Mga Bahagi ng Pananaliksik – 3.886 (May Kakayahan),  Paunang at Karagdagang Pahina – 3.923 (May Kakayahan), at Kagamitang Magagamit – 3.450 (Nasiyahan). Kabilang sa mga pangunahing pangangailangan ng mga guro ang pagkakaroon ng seminar-workshop, karagdagang pagsasanay, suporta mula sa institusyon, at mas madaling akses sa mga lokal na sanggunian sa wikang Filipino. Bagamat karaniwang masasabing may kasanayan ang mga guro, may ilang aspekto na nangangailangan pa ng karagdagang paglinang, partikular sa pagbuo ng suliranin, pagsusuri ng kaugnay na literatura, pagsulat ng abstrak, at pagtatala ng sanggunian. Iminumungkahi ng pag-aaral ang pagsasagawa ng regular na mga pagsasanay at ang pagbibigay ng sapat na kagamitan. Dagdag pa rito, hinihikayat ang Department of Education (DepEd) at ang Commission on Higher Education (CHED) na paigtingin ang mga programang pangsanay ng guro at maglaan ng mga insentibo upang higit na mapalakas ang kultura ng pananaliksik.

 

Author Biographies

John Emil Estera, Senior High School Department, Juban National High School, Philippines

Si John Emil D. Estera, PhD ay isang guro sa Juban National High School, partikular sa Senior High School Department. Nagtapos siya ng Bachelor of Education major in Filipino sa St. Louise de Marillac College of Sorsogon. Pinagtibay pa ang kanyang karunungan nang magtamo siya ng Master of Education major in Filipino sa Sorsogon State University, at nakapagtapos ng Doctor of Philosophy major in Filipino sa parehong institusyon.

Felisa D. Marbella, Graduate School, Sorsogon State University, Philippines

Si Felisa Doctama-Marbella, PhD, ay isang Associate Professor V sa Sorsogon State University – School of Graduate Studies, Sorsogon City Campus. Natamo niya ang Doctor of Philosophy in Filipino sa Bicol University, kung saan nagtapos din siya ng Master of Arts in Education, major sa Filipino, at Bachelor of Arts in Education. Sa kanyang mga pananaliksik, binigyang-diin niya ang kahalagahan ng wika at pagbasa sa pag-unlad ng edukasyon sa Pilipinas. Sa kasalukuyan, siya ay aktibong kalahok sa pagpapalaganap ng kaalaman at pagpapayaman ng kulturang Filipino sa pamamagitan ng pagtuturo at pananaliksik.

Published
2025-08-24
How to Cite
Estera, J. E., & Marbella, F. (2025, August 24). Pananaliksik-Kompetensi ng mga Guro sa Senior High School sa Filipino. Puissant, 6, 2872-2897. Retrieved from //puissant.stepacademic.net/puissant/article/view/566
Issue
Vol 6 (2025): Volume 6
Section
Articles